黃以謙盛傳獲醫學會力薦做副局長，早前獲得遴選委員會面試機會，不過事隔多時一直未有回音，難怪有人覺得自己入閣機會渺茫。不過，政治本來就有好多不確定性，另一邊廂尋日突然傳出黃有意參選九龍西，據聞連競選網站同口號等都準備就緒。
我哋就此問過黃以謙，佢承認正積極考慮參選，自稱百分百形象獨立，又話唔會「阿爺吹雞就跪低」，相信可以開拓十多個尚未開發嘅中產區。
黃以謙參選九西，相信最大影響係同樣自稱專業獨立嘅西九新動力主席梁美芬。黃以謙疑似同西九新動力劃清界線，佢話自己唔係該組織嘅成員，只係當時該組織成立時有出席過喎。