盛傳將出任副財政司司長嘅立法會會計界議員陳茂波（Paul）當日一句怕有潛在利益衝突所以避席投票，搞到政府只欠一票「打尖」失敗，頓令阿Paul入閣之期唔知「潛」咗去邊，政府架構重組落實無期。有人就質疑即將入閣嘅阿Paul點解唔為改組護航，仲話佢有政治潔癖，不過阿Paul尋日就撰文透露，其實當日政府亦有發短訊畀佢，叫佢喺投票期間唔好入會議廳。
原來阿Paul一早已同政府講咗佢會避席唔投票，而前政制及內地事務局副局長黃靜文亦親自，以及透過佢隔籬位保險界議員陳健波發短訊畀佢，叫佢喺投票期間唔好入會議廳。陳健波就話，因為議案需獲過半議員支持，而議員在席而不投票即會被當作反對，會議廳內議員愈多，就愈難獲過半數支持，所以政府當日盡量會請一直唔會支持議案嘅議員離場，以增加議案通過機會。
不過事隔多日，阿Paul特意撰文澄清事件，仲話自己避席只係要做到「比白更白」，又話「時窮節乃見」，未上任已經做定「消毒」工作，唔通佢都覺得現班子危機處處？