中環出更：問責團隊拒戴襟花撐環保
環保生活態度，貴在堅持。環境局局長黃錦星上任後，可以改變幾多市民嘅環保態度，尚待觀察，不過由自己做起就話咁易。尋晚佢出席一個政黨黨慶酒會時，大派用再造紙印製嘅環保卡片、拒戴襟花，唔止係佢，成個問責團隊都會咁做。
尋晚嘅活動，有七、八個司局長齊現身，包括主人家及高官貴賓們，個個都無戴襟花，成為畀面派對嘅罕見景象。黃錦星自爆話，問責團隊已有共識，以後出席公開活動都唔戴襟花、唔接受刻咗名嗰啲紀念品或獎座，一於身體力行撐環保。不過高官們唔係一刀切謝絕主辦機構嘅好意，如果送上嘅係一張小朋友畫嘅圖畫，咁就無拘喇！佢又話，正睇緊環保採購，打算將印製環保卡片之類嘅節約精神，推廣到其他政策局。
啱啱成為新聞人物嘅政務司司長林鄭月娥新聞秘書羅莘桉，尋晚現身酒會時呻話，當日落區遇到示威唔係被警方「帶走」，而係差人叫佢坐上警車安全啲，其實佢去到差館門口，就轉乘政府車離開。
羅莘桉怨警報大歲數
不過，成件事羅莘桉最介意嘅唔係被誤會襲擊他人，而係警方公布消息時，形容佢係三十八歲男子，其實佢要到十二月至生日，依家三十七歲咋！原來男人對年紀都唔係話唔介意。
新官上任嘅食物及衞生局局長高永文都喺度，佢一上任就上手，話要多謝一班好同事，令佢快速了解部門架構及運作喎！
卓妮