好咯好咯，四年一度嘅奧運又再嚟咯！
弊咯弊咯，精彩絕倫嘅奧運冇得睇咯！
點解會咁o架？上屆北京奧運都有得睇啦，睇到個個熱血沸騰添，今屆倫敦奧運竟然冇得睇，莫非洗腦教育洗到電視台都變咗「但凡大英帝國都是邪惡的」，所以一律禁播以免荼毒中國人純潔心靈？
非也非也，倫敦奧運之所以有機會冇得睇，原因同電視台談判撞板有關。成件事係咁嘅，國際奧委會規定，購得播放權嘅有線電視必須將最少二百小時直播撥歸免費電視，有線電視原本同亞洲電視達成協議，可於亞視國際台播放二百小時奧運節目，問題係當中涉及內地電視版權未能解決，雙方傾來傾去都未傾掂數。萬一有線無法履行國際奧委會規定，最嚴重嘅可能懲罰係連獨家播放權都被取消。
換言之，最壞嘅情況係香港冇一間免費電視台能夠播放奧運節目，即使係以天價購得播放權嘅收費電視台亦係「奧運開天窗」。假如真係出現咁惡劣嘅情況，香港就會係一個冇得睇奧運嘅低級城市，慘過第三世界呀，老友！
學似立法會議員譚偉豪話齋，呢件事淪為國際笑話。譚議員不滿政府只靠立法會議員霍震霆同國際奧委會拍膊頭企圖解決問題，促請有關當局設立機制，保障市民觀賞大型體育賽事嘅權益。言下之意即係話，要求官老爺介入。
咦咦咦，一言驚醒夢中人，政府機器理論上萬能吖嘛，官方介入一定有辦法化腐朽為神奇。正如商務及經濟發展局局長蘇錦樑表示，政府希望免費電視台能夠轉播奧運，目前仍在磋商階段，不排除日後約見三間電視台商討轉播奧運。
嗱，你唔好問官老爺應該點樣介入奧運轉播事宜，功夫茶真係答你唔到，因為商業行為一般受惠於積極不干預政策。之但係咁，非常時期需要非常手段，四年一度奧運咁大件事，冇得睇唔止係國際笑話，隨時引發體育發燒友吹雞大示威o架。所以咯喎，政府機器不妨擔當一個非常角色，穿針引線拉埋國際奧委會以及幾間電視台四四六六拆掂佢。
咁啦，呢個係蘇錦樑大顯身手嘅好機會，一洗從前做副局長時候被形容為隱形夾冇用嘅頹氣。蘇局長呀蘇局長，反正醜事傳千里之後，國際奧委會已經史無前例派人來港商討播放事宜，不妨做個熱情好客嘅東道主，請客食飯爭取達成協議囉，即係為小市民討公道，只要飯局不涉及官商勾結就得o架嘞。
簡單咁講，奧運唔可以冇得睇，麻煩官老爺暨同各大單位通力合作，否則功夫茶第一個唔放過你！