政情：阿Paul寸阿基抽林煥光水
從政者最忌優柔寡斷，但偏偏經歷過唔少風雨嘅行政會議召集人兼平等機會委員會主席林煥光（WK）就唔係咁諗。WK尋日去立法會開會後仲未就去留交代，淨係話今晚平機會開會後會有決定。但查實唔使開會都知結果，皆因撐佢留低者眾，WK立場已經無上星期咁強硬。WK快啲決定都好，唔使畀平機會委員馮檢基（阿基）多幾日時間話考慮辭職。
WK話三十幾年嘅公務生涯證明佢唔係個鍾意拖拖拉拉嘅人，又話佢識得獨立思考，但要聽咗其他人意見後先至可以決定。
選舉臨近，有水唔抽罪大惡極，阿基即時跳出嚟鬧WK身兼兩個職位有角色衝突，違反平機會公平獨立嘅原則，話如果WK唔辭就輪到佢辭喎。另一委員謝偉俊（Paul）就支持WK兩者兼得，話覺得WK最後被迫辭職真係好可惜，至於阿基都話辭職，阿Paul就話尊重佢嘅抉擇喎。阿Paul仲話唔可以用顯微鏡放大每件事，否則只會一事無成。