政情：鄉紳投票意向真假難分
政界有句名言「得鄉事、得天下」，即係話選舉有鄉事派幫助，要贏到議席不成問題，所以鄉事派嘅票一直成為各黨必爭嘅搶手貨。但其實政界亦流傳另一金句，「盲信鄉事、好難成事」，大意就係指鄉事派做嘢義字行頭，好少托人手o架，派派都話會幫手，黨黨都話支持，但到最尾手握票源何去何從，真係到開票嗰一刻先知。
自從經濟動力話會喺新界東派人出選後，動作一直多多，尋日新界東支部辦事處開幕，由於鄉議局主席劉皇發係主人家，所以一口氣請到新界東全部九個鄉嘅鄉委會主席或者副主席撐場，氣勢非常強勁，似乎想暗示選舉已獲鄉事撐腰。
自由黨大戰經濟動力
但心水清嘅人會記得，新界東其中四個鄉委會主席，包括上水、粉嶺、沙頭角及打鼓嶺曾經話過支持自由黨榮譽主席田北俊，當初仲一字排開晒冷畀記者影相，咁究竟佢哋支持自由黨定經濟動力呢？原來有人已經轉投別人懷抱，打鼓嶺鄉委會副主席林金貴已經過檔經濟動力，上水鄉委主席侯志強就有情有義，佢話自己出席經濟動力嘅活動，只屬畀面派對，唔等於會過票畀佢哋，仲話自己個心一早歸田少所屬喎，口就向田少投誠，但最尾啲票點走，真係無人得知。
同樣有去撐經濟動力嘅沙田鄉委會主席莫錦貴，都係各候選人必爭嘅抬轎武器。最初盛傳民建聯葛珮帆獲佢支持，令葛勝算大增，但後尾因為民建聯與鄉事關係轉差，到新論壇龐愛蘭話希望得到莫錦貴支持。尋日我哋再問貴哥，到底佢支持邊個，貴哥就實牙實齒話邊個原居民出選就撐邊個，咁啱經濟動力邱榮光係原居民，預料佢都會力撐邱榮光，不過如果民建聯或者公民力量都派原居民參選，咁貴哥又點算好呢？
至於已經加入經濟動力嘅大埔鄉委會主席文春輝，理應支持黨友邱榮光出選，但係佢尋日又講得好詭異，話一切聽從發叔指示，發叔叫佢支持邊個就支持邊個，唔會聽其他人講。
其實鄉事派唔係唔信得過，但佢哋位位義薄雲天，個個叫幫手都義不容辭，所以要細心分析佢哋嘅說話，先知佢哋幫邊個。