中環出更：陳亨利瘦身 一磅萬三蚊
九月立法會換屆選舉腳步愈嚟愈近，盛傳有意出戰紡織界功能組別議席嘅聯泰紡織太子爺陳亨利（Henry），最近工作議程排到密密麻麻。
為紡織業籌款
早前佢忙裏偷閒，同太太陳趙滿菊（Joise）到中環交易廣場嘅私人會所「美國會」撐枱腳。Henry望落清減唔少，原來佢同朋友打賭年底前要減三十磅，賭注係四十萬元，即係一磅值一萬三千幾蚊。
Henry話，如果佢勝出，會將錢捐畀香港紡織商會及紡織業聯會，笑稱「銀紙事小，面子事大」，所以下定決心積極減肥，三個月已減咗十幾磅。佢笑稱，以前好享受做「開心嘅肥仔」，身形總是大大隻，近年至覺得健康好重要。
講起今次減肥原因，都幾搞笑。事緣三月特首選舉投票日，幾個選委投完票後坐低飲嘢等開票，期間有人開價廿萬元要佢減三十磅，另一人聞訊也加入賭盤，所以Henry點都唔衰得。結果佢奉行清淡飲食，三個月已成功甩掉十幾磅，睇嚟成功在望喇！