即使你唔係攝影發燒友，你應該都有聽過鼎鼎大名嘅「白泥日落」。元朗白泥係一處美不勝收嘅攝影天堂，每到夕陽時分，大批龍友蜂擁而至，簡直係拍攝日落嘅不二之選。之不過咁，呢個世界好得意o架，硬係有人鍾意搞破壞大殺風景！
白泥海岸保護區有一塊農地，去年開始有人非法填土，一架接一架泥頭車，將一車接一車嘅泥頭傾倒於農地，面積接近四個維園足球場咁大。喂，叫得做保護區，梗係好珍貴先至值得保護o架啦，傾倒泥頭非法填土絕對係唔應該發生嘅事，事關生態環境會受到嚴重摧殘。
非法填土已經離譜，更加令人髮指嘅係，泥頭車傾倒嘅包括建築廢料以及電子零件等等有害物質。白泥本來係好有生態價值嘅濕地，岸邊滿布紅樹林，適合各種動物生活，萬一有害物質滲入土地甚至海水，點算好呢？冇人願意見到死魚反肚啩，紅樹林招潮蟹集體失蹤就該煨咯。
當地村民表示，去年八月開始有大量泥頭車出出入入，大片土地林木被蹂躪，昔日美景不再，只餘爛地一片。根據規劃署分區規劃大綱圖顯示，出事地點原則上只能作為農業及自然教育等等保育用途，其他發展以至填土都要獲得批准。
好嘞，規已犯，土已填，執法者係咪應該好好執法呀？係咪應該將昔日美景還原呀？還原昔日美景唔需要學識唐伯虎獨門武功「還原靚靚拳」，落個柯打叫犯規者收拾殘局，否則罰到佢甩褲就得o架喇。
點不知規劃署居然係一個懶到出汁嘅官僚部門，老早知道情況，至今乜都冇做。署方發言人證實，城市規劃委員會從未接獲相關工程申請，填土屬於違例工程，署方接到三宗投訴，調查後於舊年十一月曾向有關人士發出強制執行通知書。唔講冇咁嬲，一講把鬼火，舊年十一月發出強制執行通知書，時至今日即係已經過咗大半年啦，居然仲有泥頭車日以繼夜、夜以繼日、再日以繼夜傾倒廢料，辦事效率慢過龜速嘅規劃署係咪廢o架？立法會議員講得冇錯：「成日有泥頭車出入，佢只要肯派個人去睇，冇理由捉唔到，咁遲都唔做嘢，係咪要等到人哋填到海洋公園咁大先執法？」
好心規劃署唔好咁懶啦，香港嘅自然美景所餘無多，冇理由任得泥頭車非法填土咁冇品啫。咁啦，新政府新官上任應該有三把火，功夫茶強烈建議新特首梁振英下令，規劃署必須火速處理白泥非法堆填問題，爭取表現又好，收買人心都好，總之還原美景就乜都好！