讀歷史、鑽研佛學的林煥光，在官場打滾這麼多年，素以歷練幹才、識轉彎見稱，如今面臨魚與熊掌的抉擇，竟然說如有角色衝突，寧辭行會職位，這樣的一個選擇，除了予人太兒戲，林煥光也予人讀史學佛鑽壞腦的印象！
林煥光一時清高到目中只有明月白雲，話自己「從不求官、任命時只決定做或唔做，從來唔講數」，一時又留一線，祭出歷史唬人：我係讀歷史嘅人，好清晰講，歷史最終裁決嘅係人民……
你睇！原來林煥光最識玩歷史，一個唔覺意，又將個波交畀「人民」，要是民意要佢留低，自然不可抗拒歷史的凜然正氣！大佬啊！家陣係你決定做唔做，唔係「人民」為你抉擇，問題係你要知道自己去留，係唔係違反道德規律；既然接受份工，又怎可一副唔志在，隨時唔撈嘅嘴臉？林煥光如此表態，老朽相信即使他留任行會召集人，也不會為新政府的決策做出甚麼好事，這除了他「唔志在」、缺乏承擔外，亦如《易經》所說的天地人相處的道理；在管理上，老闆是天，基層員工是地，中間幹部是人。天好做，愛出太陽就出太陽；地也好做，反正聽話就完了；幹部最難當，因為人最難做。
看天地人相處的道理，中國式執行的最大天敵是「心不甘情不願」，中國人只要心甘情願，便表現出最強大、有效的執行力。今林煥光唔嗲唔吊，這樣「心不甘情不願」，老朽覺得佢都係潛行佛學，一於踏破水天空界月，自求我道更適宜！