政情：陳茂波「失業」遊美叉電
立法會遲遲未通過政府架構重組決議案，盛傳會做財政司副司長嘅陳茂波（Paul），喺任期屆滿後分分鐘會成為失業大軍，所以佢就趁暑假陪囡囡去美國開學，順便去埋旅行，當係做官前放大假叉足電。
阿Paul同太太育有一子一女，幾年前終於等到喺英國牛津大學讀法律嘅大仔James學成歸來做律師，但依家就輪到細女出國留學。阿Paul話，囡囡嚟緊四年會去紐約一間著名大學讀文科，但就未決定會主修邊個學科喎。
雖然阿Paul希望囡囡可以繼承佢嘅會計師衣鉢，但佢就話會完全尊重囡囡嘅決定。佢仲話，舊年幫囡囡喺美國康奈爾大學（Cornell University）報咗兩個暑期課程，畀囡囡試吓鍾意讀文科定商科，但點知素來鍾意繪畫嘅囡囡對商科避之則吉，好彩美國唔少大學頭一、兩年可以容許學生自由選修任何科目，所以到時再揀主修科都未遲。