政情：許曉暉懶理胞弟應徵副局
立法會至今仲未通過政府新架構重組建議，盛傳會出任文化局局長嘅許曉暉（Florence）暫時留任民政事務局副局長一職，其實佢細佬許正宇都有應徵做副局長，照道理可以向做過幾年副局長嘅家姐取經，相信可增加獲聘機會。不過，一向做事小心嘅Florence就疑似同細佬劃清界線，一方面話大家無就此事溝通，亦唔清楚細佬有關情況喎，似乎係避免招人話柄。
雖然未知文化局幾時先至成立，但無損Florence推動文化嘅熱情。佢尋日出席「名人好書分享會」時同小朋友大談讀書樂，佢話平時有同囡囡一齊睇《小王子》、《伊索寓言》等兒童書本，又話每年都會去書展，之後就趁機為今年書展「文化七月，悅讀夏季」賣廣告，話閱讀可以開闊人嘅眼界同放眼世界，希望在場小朋友過一個有書香嘅暑假喎。話時話，Florence以副局身份大談文化，莫非為將來做好文化工作鋪路？