政情：建制派女將 新東鬼打鬼
九月立法會選舉五區直選當中，以新界東選情最立立亂，建制派同泛民主派合共估計有廿張名單爭奪該區嘅九個議席，其中建制派嘅鬼打鬼程度，比泛民有過之而無不及。同屬建制派嘅民建聯同公民力量（公記），前者派出現任立會議員陳克勤同沙田區議員葛珮帆（EQ）出戰，後者就支持另一沙田區議員龐愛蘭（Scarlett），本來河水不犯井水，但由於原屬新界東嘅民建聯副主席劉江華將轉戰超級區議會議席，需要佢有份創辦嘅公民力量幫拖拉票，令Scarlett擔心會唔小心幫埋佢嘅直選對手EQ。最近佢就命令公民力量只可幫劉江華而不可幫EQ，但最後係咪做得到，真係冇人敢寫包單。
劉江華搵公記抬轎
劉江華由新界東直選轉戰超級議席，本來以佢嘅知名度勝算相當穩陣，但最弊係佢原有嘅民建聯地區樁腳，要全力協助克勤及EQ拉票，導致佢變成冇人冇物，喺無可選擇下要尋求公民力量助選。劉江華係公記嘅發起人之一，如今開到聲話要幫手，公記道義上冇理由托手o架。
劉江華同Scarlett一個就選超級，另一個選直選，本來冇乜牴觸，但Scarlett擔心公民力量幫劉江華拉票時，好容易連自己嘅直選票源都過埋畀民建聯嘅EQ，等於搵石頭揼自己隻腳；相反，如果公民力量要求劉江華幫Scarlett拉票，劉江華又會畀個民建聯鬧佢反骨。就喺呢個僵局下，據聞Scarlett要求公民力量同劉江華約法三章，如果劉江華搵佢哋助選，絕不能帶埋EQ一齊現身，避免令選民誤會將直選同超級兩票都投晒畀民建聯。
不過，無論有冇民建聯分票，據聞Scarlett目前嘅勝算亦只係五五波，公民力量加埋佢本身支持票都未必穩勝，嚟緊打算拜會啱啱同民建聯交惡嘅沙田鄉事委員會主席莫錦貴，希望得到沙田鄉事票支持。Scarlett最近亦成功邀請居於沙田嘅藝人廖啟智同太太陳敏兒幫手助選，希望可以提升人氣同攞多啲師奶票。