中環出更：廠佬蒲吧為顏明秀慶生
人人都話香港工業日漸式微，但一班工業家第二代唔認命，決定搞旺廠佬嘅人氣。工業總會青年委員會主席孫榮聰（Eric）及中華廠商聯合會青委主席顏明潤，日前號召幾十位兄弟姊妹，齊齊喺銅鑼灣一間酒吧Happy Hour，交流做廠心得。適逢當日係顏明潤妹妹顏明秀嘅生日，一眾青委就準備大蛋糕為伊人慶祝，場面開心到極。
工總青委副主席劉燊濤都喺度，佢話鐘錶零售生意淡靜，行內話「五窮、六絕、七翻生」，如果七月依然無起色，咁就無運行喇！曾經喺北京工作四年嘅Eric就話，內地人對香港嘅神秘感漸漸消失，要持續吸引內地遊客南下消費，確係唔容易。
當晚Eric嘅細佬孫榮良及孫榮亨亦都有現身，三兄弟難得同場，而啱啱學成返港嘅工總副主席鄭文聰嘅女兒鄭凱茵都到場湊熱鬧。