政情：兩面受敵 何鍾泰難連任

九月立法會選舉如箭在弦，多個功能界別都掀起換人風潮，連任多時同年紀有番咁上下嘅議員，好似外號「三點不露」嘅金融界李國寶及中總代表黃宜弘都疑似畀人勸退，據聞連現年七十三歲嘅Raymond亦係目標之一。有消息話，西環已物色現年五十九歲嘅前沙田委任區議員盧偉國披甲上陣，主因係佢有一定嘅議會經驗，加上過去支持政府嘅立場堅定，所以成為西環嘅「新寵兒」。我哋曾經聯絡盧偉國，但未有回覆。

另一方面，泛民亦對工程界議席蠢蠢欲動，據聞深受港珠澳大橋司法覆核案困擾嘅公民黨黎廣德會棄選，取而代之參選嘅係傳聞正申請退休嘅水務署總工程師李智明，希望以其相對獨立嘅形象參選，力爭中間票源同公務員嘅支持。

旅遊界變天幾成事實

面對建制及泛民左右夾擊，做咗十幾年議員嘅Raymond亦非省油嘅燈，據聞多名業界老行尊繼續力挺佢連任，主因係Raymond擔任公職嘅表現有目共睹，況且Raymond多次選舉嘅得票幾乎都有增無減，相反盧偉國喺去年底特首選舉委員會選舉中，票數仲低過黎廣德，有人就擔心盧偉國真係參選工程界嘅話，會否成為選舉「炮灰」喎。

究竟工程界會否換人甚至變天，依家仲係未知之數，但旅遊界變天幾乎已成事實。盛傳篤定轉戰九龍東直選嘅旅遊界議員謝偉俊話，自己無乜機會返旅遊界選，又話上屆曾經參選嘅葉慶寧主要支持者都係中小型旅行社，相反中旅高層姚思榮只有中資背景，估計葉慶寧嘅機會大啲喎，真係信不信由你喇！