每屆立法會選舉都有好多新舊臉孔參選，今年九月選舉都唔例外，多名親中色彩較濃嘅港區人大代表都有意分一杯羹，好似執業大律師廖長江、中銀高層吳亮星，分別有意出戰商界及金融界；而前藝術發展局主席馬逢國，亦有意出戰體育、演藝、文化及出版界。至於喺○八年選舉落敗嘅新民黨副主席田北辰，更有意捲土重來轉戰新界西直選。
另外，一直有參選開立法會嘅人大代表仲有自由黨劉健儀、工聯會黃國健等，最少有七個參選，有關方面有見及此，決定從善如流將人大考察團押後，最快十月先至會成行，據聞初步考慮過訪問雲南。講番疑似參選立法會嘅人大代表，其中吳亮星話自己係咪參選已經如箭在弦，適當時間會作出公布，而廖長江都話積極考慮參選。