政情：陳強送高帽畀「元朗皇帝」
政界一直有「得鄉事、得天下」嘅說法，所以每逢立法會選舉，尤其係新界戰場，鄉事就成為搶手貨，好似盛傳會出戰新界西嘅城鄉居民共和協會會長陳強，尋日就向元朗十八鄉鄉事委員會主席梁福元大送高帽，話新界有兩個皇帝，一個係鄉議局主席劉皇發，另一個就係「元朗皇帝」梁福元喎。唔知梁福元聽到，會唔會真係過票畀陳強呢？
向來同鄉事派關係良好嘅陳強，尋日出席新界各界人士回歸十五周年酒會時見到梁福元，即刻大讚佢，講講吓陳強仲幫梁福元起咗個名，叫佢做「元朗皇帝」添。梁福元聽到後好似幾受落，之後反客為主話其實陳強先至犀利。梁福元話自己細細個讀完書時，陳強已經好有成就，近年仲更加衝出元朗，連荃灣都好多人識。
兩人互送高帽一輪之後，終於入正題講選舉，可能梁福元太過開心，即場話元朗五個鄉都會支持陳強，搞到陳強笑到四萬咁嘅口。
其實鄉事派對住多方面都話會幫手，但最終有幾多個真係兌現承諾，到九月就知道。