政情：陳甘美華過渡成三朝元老
政府新班子有多張新臉孔，但我哋發現自○三年六月起出任民政事務總署署長嘅陳甘美華，竟然又順利過渡到新政府，成為極少數喺同一崗位連續服務九年嘅官員，亦係回歸後三任特首嘅「三朝元老」。特首梁振英（CY）尋日連同部分問責官員落區聽市民意見，但陳甘美華卻斯人獨憔悴，無陪同CY落區，只係出席新界各界人士回歸酒會。
翻查資料顯示，現年五十六歲嘅陳甘美華，○二年已晉升為首長級甲級政務官，其後於○三年接替人稱「媽打」李麗娟出任民政事務總署署長，此後陳太嘅官運就好似靜止咗咁，過去九年多一直原位留任，任期仲長過之前兩個特首，認真耐人尋味。
眾所周知，政務官（AO）一般每三、四年會調遷一次，按道理陳太應該調遷至少兩次，但佢反其道而行，繼續穩如泰山坐喺署長呢個職位，究竟係咪正如我哋接到嘅投訴所講，無其他政策局肯收留佢呢？定係佢另有原因唔想調職呢？呢個謎相信只有當事人同政府至知。