政情：環保博士專幫人脫賭海
沉迷賭博令人眾叛親離，唔少賭徒更因山窮水盡而走上末路。有「環保博士」之稱嘅經濟動力大埔區議員邱榮光，除咗瞓身環保事業外，仲係平和基金主席，專幫賭徒脫離賭海。佢話唔少人都輕視賭博問題，其實本港每十個人就有六、七個係賭徒，仲帶嚟唔少社會問題，不容忽視喎。
邱榮光話，賭博無處不在，小至麻雀館，大至「過大海」，每年都有唔少人因而輕生，該基金屬下嘅四個輔導中心及求助熱線，每年就救番三、四千條生命，基金仲有研究及教育小組，向社區及學校推動戒賭工作。
佢又話，可能大家對平和基金比較陌生，其實基金一直做咗唔少宣傳，好似「賭」錢落海呢段宣傳片，相信大家會耳熟能詳。講到最棘手問題，邱榮光話網上賭博最難監管，唔少年輕人以為上網賭吓老虎機好小事，但其實已經犯咗法，隨時搞到一身蟻。