政情：行會機密文件電子化
行政會議成員負責就重要政策拍板，可以話係掌管最多高度機密資料嘅一班人，有咩消息佢哋永遠係最快知，所以保密工夫絕對唔可以馬虎。據聞政府搬到添馬艦後，銳意推行無紙化環保政策，連帶行會嘅機密文件都電子化，但要做到防範機密資料外洩，當局就向每位行會成員提供兩部專用電腦，一部放公司，一部放喺屋企，每星期定時傳送機密文件，供行會成員開會前閱覽。
其實為咗防範機密資料外洩，行會多年來一直都有唔同措施，以往做法係向每位行會成員提供一個夾萬，政府每逢周六就會派專員送行會機密文件畀各成員，成員閱畢文件就放入夾萬內保存，以備每逢周二開行會之用。至於夾萬放置喺邊度就隨成員鍾意，所以唔少行會成員都有個習慣，就係星期日喺屋企慢慢歎文件，直至政府搬入添馬艦新政府總部後才有所改變。
絕緣互聯網 唔怕黑客入侵
為配合推行無紙化環保政策，行會嘅機密文件亦要電子化，當局決定為每位成員添置專用電腦，成員必須要透過專用電腦先至可以閱覽文件，而專用電腦唔會連接互聯網，唔怕被黑客入侵。據聞專用電腦設有登入密碼，即係有人偷走電腦都好，唔怕行會機密內容通晒天。據聞佢哋最初只獲編配一部電腦，但礙於有成員要喺公司同屋企兩邊走，所以最後加多部電腦方便成員。
現時行會官守及非官守成員共有三十個，即係話要購置六十部專用電腦至得，連同其他保安設備，相信花費不菲。不過，就算有電腦唔外洩，都好難確保一班成員唔會口疏爆響口。
當年港英年代嘅行政局就諗到一條好橋，防止有成員外洩機密文件。當年每位行政局成員收到嘅文件，雖然內容都係一樣，但每份嘅字眼就有少少出入，萬一機密文件洩漏，即時知道邊個係內鬼，所以當年無人敢向外界透露會議半句風聲，唔知現屆政府會唔會考慮呢招呢？