中環出更：郎朗新戲首映名媛淑女捧場

郎朗登大銀幕，駕輕就熟，事關佢喺戲內演回一個熱愛古典音樂嘅自己，度身訂造嘅角色，演出無難度。郎朗身價已屬天王級，密斟佢拍戲嘅製片人排晒隊，但佢好挑剔，揀啱先肯拍，目前最想專注嘅依然係彈鋼琴。佢除咗巡迴世界各地表演外，仲拍住港島婦女聯合會主席張雅麗（Carol）及前經理人黃錚，喺深圳開設首間音樂學校，學院年初已招生，敲門者絡繹不絕。

進軍渝滬京開音樂學校

郎朗話，稍後將進軍重慶、上海及北京等地開分校，認真有生意頭腦。因為生意結緣，Carol同朗郎已變成契姐弟關係，啱傾到極。Carol大爆朗郎開騷前，原來最愛食東北餃子。

觀瀾湖集團副主席朱鼎耀（左）都同太太出席首映禮。	梁高美懿（中）拉埋老公（右）及大女Elaine（左）睇戲輕鬆吓。	郎朗（左）登上大銀幕，同佢合作搞音樂學校嘅張雅麗帶埋兒子捧場。（徐家浩攝）

首映禮人山人海，卓妮見到前恒生銀行女大班梁高美懿一家外，仲見到女童軍香港總監彭徐美雲帶埋公仔彭穎生及榮升太平紳士嘅老公彭曉明撐場。彭太八月初帶隊坐火車去絲路，同行有幾百個女童軍，心情雀躍，佢話預咗未必日日有涼沖，所以買定大包濕紙巾、高度防曬霜及蚊怕水，有備無患。

卓妮