貪曾打壓傳媒 東方不畏蔭權

呢嗱嗱嗱，醜聞纏身嘅曾蔭權已經被揭發係「香港第一貪官」，所以上任特首七年以來瘋狂打壓東方報業集團唔係冇道理o架。呢個道理就係，貪官箝制新聞自由先至可以黑箱作業為所欲為吖嘛。

貪曾政權點樣打壓東方，有一件大細超事件係最佳例子。二○○五年十二月，曾蔭權已經吹完口哨坐上特首寶座，《東方日報》及《太陽報》刊登一輯外國女星Kelly Brook沙灘性感照，打晒格仔嘅，仍然被淫審處評為二級不雅，但係《蘋果日報》刊登同一輯照片，只係評為一級非不雅。更加奇怪嘅係，喺香港有售嘅外國雜誌《NOW》刊出Kelly Brook裸照，格仔都冇打，亦冇包膠袋，竟然連送檢都冇，評級當然唔使。同一輯照片竟然有三重標準，呢家嘢就係選擇性檢控。

如果你以為只有一個管淫管褻嘅官方部門玩針對，你錯嘞，政府機器利用「假調查真滋擾」嚟迫害東方嘅部門多到唔恨。好似平機會咁吖，居然將東方捲入一宗無聊透頂嘅混帳官司。

二○○六年九月，《太陽報》以「醫局規劃發神經，病房逼到人都癲」為題發表文章，批評醫管局規劃失當，令到九龍精神科觀察治療中心長期超收五成病人，損害精神病患者權益。正常人都睇得出，文章主旨係幫精神病患者，要求醫管局改善。哈，平機會話接到市民投訴，不滿文章提到一個「癲」字，認為係「殘疾中傷」喎。無無聊聊嘅平機會居然受理，煞有介事告上法庭。官司纏擾幾年，法庭最終宣判，平機會敗訴，《太陽報》無罪。

喂，平機會亂打一場毫無理據嘅官司，到底所為何事呀？你話平機會唔係借頭借路為東方製造麻煩，搵鬼信啦！

其他例子多到數唔晒，再數落去又係人都癲。功夫茶只想同大家講一樣嘢，貪官透過插贓嫁禍嚟打壓正義傳媒冇可能成功，到頭來只會自招其辱。鐵一般嘅事實擺在眼前啦，東方報業集團連環出擊，獨家報道曾蔭權接受富豪款待，又喺深圳準備入住超豪廉租屋，結果震驚全城，貪曾創咗香港開埠以來第一個紀錄，政府最高領導人接受廉署調查。

所以話啫，真的假不了，假的真不了。插贓嫁禍係假嘅，所以貪曾打壓傳媒唔成功；舔盡便宜係真嘅，所以東方監察貪曾好成功。

總而言之一句講晒，東方不畏強權，更加不畏蔭權，貪官唔會有運行！