政情：誠信受質疑 梁卓偉扯火
貪曾早前被審計報告話佢豪華外訪大花筒，卸任在即嘅特首辦主任梁卓偉（Gabriel）尋日最後一次去立法會回應議員對貪曾嘅批評。民主黨李華明批評特首私人秘書獨攬大權，又大鬧貪曾外訪時用自己張信用卡簽帳儲分係無晒規矩，甘乃威亦批評Gabriel嘅解釋只係狡辯，誠信有問題，搞到Gabriel即時黑面扯火。
Gabriel話，議員可以批評佢任內邊啲地方做得唔好，但佢絕對唔可以接受議員質疑佢嘅誠信同話佢狡辯，又話自己作為特首辦主任，喺呢件事上係責無旁貸嘅。後來Gabriel情緒穩定啲後，先至用番正常語氣話，當局會研究用公司信用卡畀錢嘅可行性，亦已草擬好新外訪指引，今日會交予候任特首辦盡快落實。
Gabriel朝早為貪曾扯晒火，尋晚又要搞門面工夫喺禮賓府搞聚會歡送貪曾兩公婆。事後特首辦將歡送會嘅相片上載到facebook專頁，結果惹來網民鬧貪曾厚顏無恥，嘥公帑搞擦鞋歡送會，叫佢回水之餘，又希望廉政公署快啲拉人，貪曾淪落至此，認真可悲！