政情：逾1/6議員 冇為民請命
今屆立法會會期即將完結，又係時候為各議員埋單計數。做議員除咗要跟規矩開足會外，接見同處理市民申訴都係重要工作之一。不過，我哋翻查今個立法年度六十名議員經申訴部處理申訴個案嘅數字，發現有十一位議員無處理過市民投訴，除咗包括幾位「大懶蟲」議員外，經常自命「為民請命」嘅多名泛民主派議員都懶理市民申訴，認真過分。
現時立法會申訴部每個星期都會安排六位議員輪流當值，處理市民嘅意見及申訴。根據立法會秘書處紀錄，雖然大部分議員喺過去一年都當值過三至四次，但佢哋處理個案嘅數字卻少之又少，當中更發現有十一位「零個案」嘅議員，包括被封為「大懶蟲」嘅金融界李國寶、商界黃宜弘及體育、演藝、文化及出版界霍震霆。
吳靄儀鄭家富懶理申訴
「零個案」嘅建制派議員仲有地產建造界石禮謙、工程界何鍾泰、飲食界張宇人、工業界林大輝、工業界梁君彥，就連盛傳過檔新政府做財政司副司長嘅會計界陳茂波（Paul）都係一分子。咪以為淨係建制派先至懶理市民申訴，泛民議員都大有人在，佢哋就係公民黨嘅法律界吳靄儀及新界東直選議員鄭家富，成年都無處理過立法會申訴部嘅個案。
阿Paul就解釋，佢一向都有跟進市民投訴有關劏房嘅問題，又話自己一直對立法會申訴部轉交嘅個案採取「無甩拖」嘅態度，唔明白點解自己會排包尾喎。表明下屆唔再參選嘅鄭家富就話，佢喺議員辦事處已經接咗好多個案，所以無時間接收立法會申訴部嘅投訴個案喎。如果個個議員都只係顧住自己辦事處嘅投訴，咁申訴部可以摺埋喇！
其實又唔使咁悲觀嘅，立法會都有多名勤力嘅議員，例如社福界張國柱就成為年度「申訴之王」，總共處理咗廿五宗投訴、黃成智及「長毛」梁國雄亦分別處理咗廿二宗及廿一宗投訴。阿柱好謙虛話，自己只係做好分內工作，又話申訴部先至可以為市民提供到最直接嘅服務喎。