中環出更：趙樓神撐CY 僭建無心之失
候任特首梁振英（CY）大宅捲入僭建風波，估唔到演變成為一堂通識課，事關原來測量師都分六種咁多。卓妮日前喺旅港蘇浙滬各界人士齊聚嘅晚宴上，見到長實執行董事趙國雄（趙樓神），佢話產業測量師同建築測量師真係唔同，所以都理解CY一路無察覺。佢又話，今次事件顯示買二手樓存在風險，所以大家最好買一手樓喎，趁機推銷公司樓盤。
當晚江蘇、浙江及上海嘅猛人齊集，包括「世界毛紡大王」曹光彪嘅兒子曹其鏞、製衣大王陳元鉅及兒子陳仲尼、頂尖度身定造名牌「詩閣」董事總經理張德祥及創辦人張子斌嘅兒子張宗琪等。咁多人捧場，證實三位聯席主席包括上海總會會長王緒亮、浙江省同鄉會聯合會會長李德麟及江蘇旅港同鄉會聯合會會長馬忠禮嘅號召力強勁，難怪佢哋全晚開心滿場飛。
