生兒育女有人覺得係好事，有人覺得係苦差，視乎每個人嘅價值觀而定。雖然話香港出生率極低，醫院產房嘅服務對象唔少係來自內地嘅雙非孕婦，不過土生土長嘅本地爸爸媽媽始終大有人在。換言之，不但醫院有必要提供適切服務，制度上同樣應該有適切部署。
點先至叫做制度上有適切部署呢？即係咁，為男士設立有薪侍產假，就係其中一項適切部署。你知啦，雖然男人先天上唔係一部生仔機器，之但係都要幫老婆執頭執尾吖嘛，身懷六甲嘅另一半，有時都會忙到頭殼頂出煙o架。
貪腐醜聞纏身嘅曾蔭權，七年任內唯一比較可取嘅係拋出侍產假概念，可惜為德不卒，呢一個概念受惠嘅例牌又係先天下之樂而樂嘅公務員，老婆一旦變身大肚婆就可以申請放假。講到呢度，功夫茶真係要讚一讚公務員嘅自私效率，一涉及官老爺嘅切身利益，加薪又好，推出五天工作周又好，辦事作風必然一改龜速傳統，簡直快過人類史上跑得最快嘅曹操。唔知曹操有幾快？一講曹操，曹操就到，你話快唔快吖！
好嘞，立法會終於討論立法制訂有薪侍產假，試圖惠及非公務員嘅打工仔。出席立法會討論嘅勞工處處長卓永興係咁講嘅，本港出生率低，預計男士領取侍產假嘅次數不多，只要將假期日數訂於適當水平，不會大幅增加僱主開支。卓處長又話，估算若果推行三至五天有薪侍產假，全港整體每年開支介乎一億四千萬至二億四千萬元，佔總工資額百分之零點零二至零點零四，相信僱主可以承擔。
卓永興講到好似實牙實齒，問題係議員感受到有人耍太極。議員批評政府冇立法決心，提出好多立法嘅枝節，只係藉詞推搪，猶如推行最低工資翻版。勞工界李鳳英認為，政府不可再蹉跎歲月，社會對推行有薪侍產假早有共識。社福界張國柱亦指出，目前只有公務員系統推行，結果可能有偏差，建議政府同時喺非政府及外判機構試行有薪侍產假。
簡單咁講，急驚風遇着慢郎中，想生仔偏偏冇假放。冇辦法啦，政府嘅自私效率只適用於福為官開，福為民開呢家嘢，曾蔭權當年隨口噏當秘笈o架咋，情況就好比貪曾自己為自己設定嘅所謂防貪守則，吹水之嘛，冇文本o架。
只准州官放火，不准百姓點燈？差不多啦，比較準確嘅講法應該係咁，州官添丁有假放，百姓侍產了無期。所以話啫，各位本地爸爸媽媽，小寶寶日後長大成人，投身官場實在係上佳選擇，唔學曾蔭權做貪官都可以富貴榮華o架！