香港空氣污染愈來愈嚴重，多數市民其實都有共識；之不過政府公布嘅微細懸浮粒子數據，竟然靚到好似去咗「世外桃源」，否則有乜理由過去三個月，僅有一日喺銅鑼灣監測站錄得超標！而民間環保組織嘅監測，如果套用世衞標準，本港十一個一般監測站錄得嘅污染數據大都「超標」，尤其銅鑼灣過去三個月更超標七十一日！
官方數字同環保組織嘅數字可謂判若雲泥，咁信邊個？仲使問阿桂，梗係信環保組織喇！事關官方成日呃人！官方嘅一般監測站原來多設於人煙稀少嘅天台，如此採樣，空氣梗冇懸浮粒子啦！
讀者唔善忘，都知道北京車多人多，仲有沙塵暴，空氣污染指數嚇到冇朋友，美國駐華大使館成日話北京市區嘅懸浮微粒糟糕透頂（Crazy bad），北京市環保局卻堅稱只是「輕度」，完全可接受！之不過網民就揶揄，官方與美國駐華大使館何以落差如此大，皆因官方量度的空氣來自中南海！
香港環保署大可以將監察站搬去山頂高官富豪住嘅地區，咁香港就日日是藍天，根本沒有空氣污染嘅問題！香港環保署諸高官，即使講大話呃人都算有「本心」，起碼銅鑼灣污染指數都有一日超標！好過內地官員講大話唔眨眼，夠膽死話活熊取膽汁過程就像開自來水管一樣簡單，自然、無痛，完了之後，熊就痛痛快快出去玩了！鬼唔望佢他日開刀做手術，醫生唔記得同佢注射麻醉藥！