政情：D姐七一後玩轉香港
公務員事務局局長俞宗怡D姐尋日喺佢任職公務三十八年零十日罕有同傳媒聚會，D姐唔會留任下屆政府，不過大家未必估到，D姐退休後最想做嘅嘢，竟然係去大嶼山搭昂坪「三碌拎」。
D姐七一之後會先清晒之前儲落接近一年嘅大假，一年後先至正式退休，不過笑言熟讀公務員辭職機制嘅佢就未有計劃做任何受薪工作，話會先好好享受佢嘅平民生活，佢嘅「平民生活」清單仲有去迪士尼同埋自佢做完學生妹後都無去過嘅海洋公園，同埋得閒去睇吓電影早場。
回顧跨越兩個世紀嘅公務生涯，D姐話梁展文事件係佢工作里程碑。最近曾蔭權連串嘅貪心事件會否動搖公務員士氣？D姐就話公務員嘅工作係點，相信「好鍾意旅遊」嘅香港人自然心中有數，事關去得多旅行，親身體會外國嘅行政效率，就自然會知香港好。D姐一言道出港人愛旅遊，竟同貪曾愛旅遊呢個前提互相呼應。
船行萬里，亦有到岸時，D姐話唔想好似「鬼船」咁「飄吓飄吓」，所以都係時候退下來，不過既然都到岸咯，唔知D姐會唔會諗住泊埋個好碼頭呢？