食物及衞生局局長周一嶽下屆政府無得撈，平時經常批評佢嘅一班立法會議員，就更加當佢無到，仲向佢嘅醫科專業埋手。話說尋日立法會大會有條質詢問豬肉價格點解咁貴，本身係骨科醫生嘅周一鑊，就被議員問佢識唔識分豬尾骨同豬筒骨，因為有啲超市魚目混珠，好蠱惑將賤價嘅豬筒骨假扮貴價嘅豬尾骨出售，要求當局杜絕呢啲欺騙行為。
呢條問題已經問得騎呢，點知周一鑊答得仲搞笑，話自己唔係獸醫，佢對動物骨骼唔係好熟，所以唔識分喎。至於提出質詢嘅民協馮檢基就問，點解豬隻嘅批發價平，但零售價反而會貴呢？呢樣周一鑊就識答喇，佢話一隻豬唔單止有豬肉，仲有內臟、骨頭同肥肉，如果扣除晒呢啲嘢，剩番嘅豬肉價格可能會貴咗，總之價格由市場自由釐定喎。雖然呢條質詢最後無乜結果，但就為沉悶嘅會議帶來一陣笑聲。