政情：自發侍產假 難過老虎食齋

有薪侍產假立法討論咁耐，勞工處處長卓永興尋日喺立法會人力事務委員會上，仲話要再研究一啲法律問題及評估對經濟嘅影響，今年第四季先至提交勞工顧問委員會討論，惹來多名議員狠批政府拖延立法。

工聯會潘佩璆批評，如果唔靠立法而單靠商界自願或企業良知去做，就等於想老虎食齋，根本係妄想！勞聯李鳳英就叫政府唔好再講廢話，順應民意盡快為有薪侍產假立法。