政情：陳雲數肥平五大功績

不過，嶺南大學中文系助理教授陳雲，近日就撰文力數肥平嘅五大功績。睇完呢篇咁精彩嘅文章，相信肥平出任副司長一職，絕對無走雞！

由香港政策研究所、藝術發展局、以至民政局年代都跟過肥平做嘢嘅陳雲，喺文中力數肥平任內五大功績，包括成功說服新界鄉紳接受雙村長制、游說教育同宗教團體體諒賭波合法化、落實搬遷體院以承辦奧運馬術賽、游說社會及受影響政府部門支持文物建築保育政策，以及推出無半點「親共」或「愛國教育」意味嘅文化政策，強調肥平並非「一味靠親共、靠紅色上位」。

陳雲又話，正正因為肥平處事「溫文婉約、老練到家」，佢落任時先至咁「無聲無息」；肥平嘅繼任人曾德成任內「無風無浪、水波不興」，亦變相印證呢種施政作風正係民政局所需，大家唔應該特別針對肥平喎。