口口聲聲話會就貪曾嘥公帑豪華外訪一事「雙倍負責」嘅前特首辦主任譚志源（Raymond），至今市民都睇唔到佢「負責」咗啲乜嘢。正當議員尋日狂插政府至今未有官員下台辭職、完全漠視問責制時，Raymond竟然話喺事件後，成個特首辦團隊都受到議員嚴厲指摘，心理上都承受好大壓力，所以都算係問責嘅一種形式喎，真係噏得就噏。
貪曾被踢爆豪華外訪後，涉及嘅高官話就話會負全責，但原來只係信口開河，敷衍市民。民主黨劉慧卿就寸爆Raymond，問佢之前所講嘅「雙倍負責」，係咪會將豪華外訪嘅錢雙倍捐番畀庫房或者慈善機構。點知Raymond回應所謂嘅「負責」，就係留低認錯，同埋繼續跟進事件。
Raymond仲扮晒可憐話，其實成班特首辦團隊近期都心理受壓，不停受議員指摘，都算係問責之一喎。聽完佢咁講，先知政府內部嘅問責底線原來係咁低嘅，咁以前因為犯錯而辭職嘅問責官員，豈不是辭錯職？