政情：民記好大喜功 鄉紳擘面
鄉事派同民建聯喺近年選舉都爆出爭拗，九月立法會選舉臨近，近日又傳出沙田鄉事派同民建聯擘面。話說沙田鄉事委員會極力反對沙田區議會中秋節日工作小組，動用百幾萬元公帑大搞今年嘅中秋節晚會電視節目，質疑為個別人士出風頭，由於民建聯傾向支持舉辦有關活動，結果惹來沙田鄉委會不滿，仲決定唔再為該黨新界東參選人葛珮帆助選，更不排除改為支持該黨對手公民力量龐愛蘭。
沙田區議會往年都有搵電視台搞中秋晚會，今年就預算用一百三十萬元，以地區活動嚟講算係大數目。據悉，身兼當然區議員嘅沙田鄉委會主席莫錦貴早前就喺工作小組會議上，極力反對動用咁多公帑搞晚會，認為啲錢應該用晒落地區活動上，此舉對沙田街坊更能夠得益。
節日工作小組原訂本月廿五日再開會討論，但負責嘅沙田民政處職員原來早就預備好活動財政預算，仲以傳閱方式交畀一眾小組成員，要求各人喺十八日前表態，完全係扼殺討論。據聞莫錦貴早前亦要求民政處職員轉交佢封反對信畀小組成員，但職員竟然話要過咗十八日先肯幫佢轉交封反對信，此舉完全係想快刀斬亂麻，喺未經討論之下，盡早通過活動預算。
莫錦貴擬棄「葛」挺「龐」
當呢單醜聞尋日喺地區廣泛傳開後，沙田民政處突然將事件攬晒上身，總之就話同其他人無關喎。咁就奇怪喇，點解民政處可以唔使知會工作小組召集人、民建聯彭長緯，就可任意決定只透過傳閱方式要求小組成員表態呢？如果係咁，彭長緯就等於被架空，召集人個位形同廢咗武功。我哋曾經透過電話同電郵聯絡彭長緯，但佢到截稿前都無回覆。
無論係邊個話一定要搞中秋晚會都好，要動用百幾萬元搞一場晚會確係浪費公帑，喺本港貧富懸殊愈來愈嚴重下，倒不如將資源用喺其他有意義嘅項目上，好過只係畀個別人士上電視出風頭啦！中秋晚會搞成點未知，但肯定鄉事派同民建聯已經擘面，據聞沙田鄉委會已要求葛珮帆本周內將掛喺鄉委會會址上嘅大型橫額拆除，而莫錦貴亦考慮為公民力量龐愛蘭抬轎選立法會。