中環出更：梁太密密飛 享受退休生活
前恒生銀行女大班梁高美懿上月退休，當時好多人都估佢會加入新政府，但佢好快就澄清無意加入官場，反而會去旅行享受人生，計劃今個月飛澳洲打高球同參觀酒莊。話就咁話，梁太近日依然頻頻出席公開活動，連澳洲之旅都要暫時擱置，莫非佢為預備愛女十一月出閣，忙到無時間外遊？
卓妮周日喺沙田馬場見到梁太同丈夫梁承達拖住入場，退休後嘅梁太喺衣着上毫不鬆懈，一襲粉紅色套裝，醒神又端莊。問梁太點解仲未去澳洲，佢話因為機票問題改咗期，可能要延期到囡囡出嫁後先至去喎。
短途旅行 大玩特玩
雖然澳洲之行要延期，但梁太之前都去咗幾次短途旅行，好似上兩個星期先去完張家界，跟住又會去澳門，七月仲會飛泰國享受陽光與海灘添，實行大玩特玩。問到以上旅程係咪同丈夫二人世界？梁太就話仲有大班老友一齊玩喎！
卓妮