中環出更：陳惠仁收藏古籍 保存智慧
卓妮日前行經中環贊善里隱市書店「樂文」時，就見到私人投資公司Chartwell Capital創辦人兼投資總監、促進教育基金會副主席陳惠仁（Ronald）喺入面聚精匯神咁睇書，又與店主Lorence Johnston交流，原來佢研究緊嘅係價值連城嘅古書，本本值千金。Ronald話，七年前已開始收藏古書，原因唔係為博升值賺錢，而係想保存古人嘅智慧喎。
Ronald話，佢首本收藏嘅係已故英國首相邱吉爾嘅著作，皆因佢好崇拜邱吉爾，不時買佢嘅相片、用過嘅筆等，為咗進一步窺探邱吉爾嘅內心世界，於是買下佢嘅著作，買埋買埋，至今收藏近二百本古書。佢最愛嘅珍藏之一，係一七九七年出版、一套三冊嘅《英使馬嘎爾尼訪華檔案史料匯編》，係英國特使馬嘎爾尼首次訪華後，返回英國所寫嘅見聞錄，彌足珍貴。
最想擁有《康熙字典》
古書唔一定愈舊愈貴，Ronald話，原來近代書更有炒賣價值，好似名小說《占士邦》、兒童書《小王子》初版都極具收藏價值。仲有上世紀四、五十年代出版嘅書，當年因戰火摧毀令書籍變得矜貴。
講到最想擁有嘅書籍，Ronald話係四十二冊《康熙字典》，可惜中國人發明印刷及造紙，但保存技術做得唔好，要搵完整嘅中國歷史書都好困難。至於佢嘅終極目標，就係創立一間古書圖書館，供學者參考。佢仲提醒大家，買古書最好揀書身完整，仲要事先研究書籍嘅歷史背景，以辨真偽，原來買書都係一門學問。
卓妮