昨日，彩虹，全香港幾乎人人都見到彩虹，到底係唔係吉兆呢？功夫茶主觀願望相信確係吉兆，原因係香港第一貪官曾蔭權將於十日後執包袱落台，連個天都拍爛手掌，於是送一條靚到無倫嘅彩虹下凡賀一賀佢。雨過就會天青，否極就會泰來，貪曾滾蛋好比送走瘟神，香港未來有機會重遇青天大老爺。
如果你好似煲呔咁係虔誠嘅天主教信徒，更加會認為彩虹橫空出世係吉兆。根據聖經記載，上帝後悔創造咗罪孽深重嘅人類，一怒之下發洪水毀滅世界，淨係透過方舟救咗挪亞一家以及每種動物各一對。洪水消退，彩虹出現，上帝以此為記，向逃出生天嘅挪亞承諾，以後都唔會出動洪水浸死所有可惡嘅人類。照咁講，香港出現彩虹代表呢一座罪孽深重嘅城市唔會被消滅，哈利路亞！
係呀，香港確係罪孽深重，由貪曾帶頭破壞廉潔奉公嘅核心價值吖嘛，形象下滑到回歸以來最低點。罪孽深重到一個程度，外國傳媒亦有必要大篇幅報道。好似美國《華爾街日報》咁吖，網上版為曾蔭權埋單總結，大致係話呢一個英國爵士晚節不保，官場打滾四十五年終於喺醜聞纏身嘅情況之下告別特首寶座。
貪曾醜事傳千里，唔止美國《華爾街日報》關注o架，英國《泰晤士報》早前亦有跟進報道，詳盡介紹呢一個「痛心特首」如何接受富豪奢華款待，如何導致香港形象蒙羞。換言之，曾蔭權做咗國際知名人士，可惜係貪婪成性嘅反面教材。功夫茶有少少疑惑，如果上帝當初冇以彩虹為記承諾唔會再屠殺全人類，見到自己嘅所謂虔誠信徒不斷做出缺德勾當，會唔會好似消滅罪惡之都所多瑪同蛾摩拉一樣，天降硫磺與火直接向禮賓府行刑？
《華爾街日報》唔止總結香港第一貪官嘅醜聞o架，連失敗政績都一覽無遺。失敗政績包括七年任內貧富懸殊加劇，樓價不斷飆升，空氣繼續污染，吸引力被長期競爭對手新加坡比下去。
講到貧富懸殊加劇，不得不提政府統計處新近發表嘅報告。反映收入差距嘅堅尼系數錄得四十年以來最高嘅零點五三七，家庭住戶收入兩極化，最低同最高收入相差四十五倍。簡單咁講，人數極少嘅富豪擁有大部分資產，一貧如洗嘅窮人已經組成「一百二十萬大軍」。你話嘞，曾蔭權同富豪勾勾搭搭黐飲黐食，點會唔天怒人怨吖！
其實講到尾，只係一條彩虹唔足以令到香港雨過天青，必須依靠反貪防腐。麻煩廉署徹查貪曾，必要時收監法辦，到時維港上空一定再見彩虹！