貪曾禍港七年，佢話「會做好份工」，查實係貪盡份好工，結果香港蹉跎了歲月，淪為「空港」！貪曾七年來口口聲聲話要收窄社會貧富差距，結果喺佢即將下台時，貧富差距益見拓大，兩者相差拉闊至四十五倍！
鬼咩！上樑不正下樑歪，貪曾頻頻外訪，狂花公帑住總統套房，一眾高官每每有樣學樣，亦頻頻外訪，動作多多，公帑花了一大筆，真正用得其所而令市民得益嘅，恐怕冇一樣可以公諸天下，擺在陽光下見得人也！
大多市民無不寄望候任特首CY能撥亂反正，除了糾正高官「不做事沒有事，做事可能出事」的歪風，要多落區聽民意；而CY自己更要執正，以身作則，切勿「以做好份工」為滿足，千祈千祈千祈要將「特首」份工當作「事業」。
「事業」兩字，一早見於《易經》。孔子解釋過乜嘢叫「事業」：舉而措之天下之民，謂之事業。舉，即舉動、行為，要做的事業，「措之天下之民」，要言之，令到老百姓得到利益，人民得到安定，這就叫「事業」；若然「利為己開」，以權謀私，舔到最後一分一秒，呢啲唔係事業而係冤孽！做特首要成就一番事業，當然唔係口噏噏，當秘笈，更唔係吹水、吹口哨就可以「福為民開」，要成就「事業」，確要有承擔，肯付出，換言之，要有犧牲嘅精神！願CY將「特首」當成「事業」而不是「一份工」，則百姓將嗅到失落久矣的「香」港！