政情：張炳良上車節衣縮食
盛傳將會喺七月加入新班子做房屋局局長嘅張炳良，尋日最後一次以香港教育學院校長身份同記者聚會。大家都好關心張炳良對未來房屋政策有咩新構思，佢話好明白唔少港人都想擁有自己嘅居所，仲自爆喺八十年代買樓上車時，都係左度右度同老婆睇住本紅簿仔做人，供樓用咗家庭收入嘅一半，一個月出街食飯嘅次數少之又少。
照計張炳良咁了解買樓同供樓嘅辛酸，日後嘅房屋政策話唔定會多啲照顧希望置業嘅年輕人，但相信年輕人都要好似佢咁識得節衣縮食至得。離任教院校長在即，張炳良話依家忙緊搬屋，事關佢住緊嘅校長宿舍有成過百本書要搬走，仲有一大堆香港政治、政黨發展、六四事件等剪報，又唔捨得丟，所以執極都執唔完喎。
張炳良又話，已經向教院師生臨別贈言，仲送咗個有成六、七頁紙嘅「校長錦囊」畀將會署任校長嘅鄭燕祥教授，因為佢預期鄭教授可能要署任一段較長時間，預計聘請新校長最少要九個月時間。