做電影出身嘅港區人大代表馬逢國，近期又活躍於政圈，有傳佢係為鋪路參選立法會硬撼現任體育、演藝及文化出版界議員霍震霆。尋日佢接受電台訪問大談陳年往事，話當年搞左派電影，都要被中央政治審查，但有時鑽空子就可以拍到自己想拍嘅戲種，似乎佢想話畀選民聽，拍左派電影都唔一定聽晒阿爺話嘅。
馬逢國當年監製嘅《秋菊打官司》、《最後的貴族》等左派電影都大獲好評，佢憶述當年拍戲點滴時話，其實左派電影並唔係樣板戲，因為當年開戲目的，係想拍啲有一定藝術質量嘅戲，而且齣齣戲都係導人向善，所以拍左派電影好有滿足感。
不過，馬逢國都好老實話，左派電影唔能夠發展落去，其中一個原因係缺乏演員，因為當年拍左派電影人工好少，通常得行內嘅一半，所以留唔到好演員。除咗演員外，有時仲要配合內地政治標準，因為有時鬆有時緊，如果只用同一標準，分分鐘出事，所以有時都要鑽空子，唔好以為左派電影就大晒，唔使畀人審查喎。