政情：KK一生為民也徒然？
民協尋日公布立法會選舉部署，現任立法會議員馮檢基（KK）將出戰超級區議會，該黨主席廖成利透露，早前有好多人「溫馨提示」叫佢哋唔好選超級議席，但佢哋做過危機評估後就決定迎難而上。
至於未來宣傳策略同民調，就到依家都未傾，但就搞咗個「選舉心戰室」度宣傳攻略喎。
嘩！出動到心戰室咁犀利，唔知佢哋嘅宣傳品有乜咁把炮呢？尋日我哋就喺民協見到一張宣傳單張，單張印有KK七十年代喺徙置區做社工嘅陳年照，表明自己「一生為民、由徒置區開始」。可惜個「徙」字寫錯咗做「徒」字，或者KK想表達喺徙置區揼嘅石仔，都係徒然嘅！呢張傳單喺月初已開始派發，如果大家想攞到呢張錯體別注版，就要快手喇！
至於一樣打算出選超級議席嘅民建聯李慧琼就話，佢嚟緊會一拖四出選，但佢就對選情唔係咁樂觀，仲話遲啲會向新民黨主席葉劉淑儀拜票，爭取港島區選民支持喎。