政情：星爺踢走李國寶 益咗波哥
特首選舉結束後，多名提名咗唐英年嘅建制派立法會議員，都被指會喺九月選舉無運行，需面對候任特首梁振英（CY）嘅支持者挑戰，其中一位被點名嘅係保險界陳健波（波哥），疑似對手正係挺梁嘅中銀人壽執行總裁蔡中虎。不過，最近有消息指，波哥應有望順利連任，原因居然同另一深唐人士金融界李國寶畀人踢走有關，內情曲折得嚟又幾有道理，真係信不信由你。
波哥○八年當選保險界議員嘅過程，本身已經十分驚險，要經過第二輪點票，先至以六十票對五十二票擊敗主要對手蔡中虎，係咁多名挺唐議員當中贏得最險嘅一個。加上據聞蔡中虎係CY嘅舊同學，喺特首選舉中一直力挺CY，CY當選後更邀請佢站台一齊慶祝，早前又頻頻接受傳媒訪問爭取曝光，令人覺得波哥要成功連任真係唔容易。
恐中資企業霸太多位
不過，最近政商界傳來消息，話波哥應可順利連任，蔡中虎可能會被勸退，原因竟同金融界李國寶被港區人大代表吳亮星（星爺）踢走有關。點解波哥能否成功連任，會同李國寶扯上關係呢？消息話，事緣星爺同蔡中虎都係來自中銀，雖然前者負責銀行業務，後者就做中銀人壽，但喺政界同商界眼中，都係來自同一個體系及機構，阿爺兩個都支持，難免會引起其他利益集團不滿，質疑中資企業霸太多位，因此需要作出取捨。
外號「三點不露」嘅李國寶出名係立法會大懶蟲，多年來都零動議零修訂，反觀波哥就出名勤力開足會，任內就醫療融資問題、馬尼拉人質事件同汽車業保險爭議，為業界出咗唔少力。雖然波哥提名咗唐唐，但佢嘅唐營色彩，相對於幫唐唐做競選辦主任嘅李國寶、以至唐唐嘅「家臣」廠商會林大輝同「護法」總商會林健鋒都無咁濃厚，要喺呢兩個人之間揀一個留低，梗係揀波哥啦！如果最後波哥同星爺真係雙雙成功當選，真係要請對方飲茶先至得喇。