中環出更：李家傑發燒 四叔頂更湊B
生咗三胞胎嘅恒基地產主席李兆基（四叔）長子李家傑，今個父親節分外心甜，佢三個得意BB已經兩歲，唔止牙牙學語識叫爸爸，仲合力畫心意卡氹爸爸開心，可惜家傑感冒發燒，佳節當日要同愛B隔離，幸好有爺爺四叔「頂更」，湊孫樂也融融。
匯聚城中富二代嘅「百仁基金」，前晚喺中環五稜會舉行周年會員大會，理文造紙太子爺李文俊（Raymond）當選新一屆主席，身為創會主席嘅李家傑帶病到賀。
近日流感肆虐，家傑都打敗仗發燒，為免傳染三個BB，被迫匿埋房間獨自隔離幾日，湊仔任務，就交畀細佬李家誠及弟婦徐子淇喇。
對於候任特首梁振英話研究五折售居屋，家傑話係好事，贊成幫助中產階層置業，但應該用幾多折賣，就要慢慢傾喎。
李文俊接掌百仁基金
Raymond都趁父親節同「造紙大王」爸爸李運強食飯，大家平日忙到無時停，連見一面都難，難得圍埋食餐飯，開心過中獎。
將接任「百仁」主席，Raymond預咗忙上加忙，但做得主席，就預備深入基層，了解市民真正需要喎。佢又決定為「百仁」成立顧問局，將歷屆主席納入其中，由家傑任顧問局主席。
現屆主席施榮忻（Jaime）將於六月尾卸任，唔經唔覺，佢已投身青年工作五年，係時候抖抖。佢嚟緊將專注打理家族地產及礦業生意，又會重返校園進修，佢細仔湧濤出世已個半月，眨眼十三磅重，八月初將搞百日宴，齊齊高興吓。
卓妮