街市煲煙 食署扮盲
禁煙條例雖已實施多時，在部門有法不執下，違規情況卻無日無之！上水古洞街巿購物中心經常有人違例吸煙，街坊不滿要長期吸食二手煙而屢作舉報，但負責街市管理的食物環境衞生署，甚至專責執行條例的控煙辦卻鮮作勸阻及檢控。區議員與立法會議員皆批評兩部門處事被動，要求盡快嚴正處理問題。
「喺呢度食飯兼煲煙完全冇人理，啲煙民梗係鍾意啦！」陳先生指古洞街巿購物中心內設熟食中心，乃附近街坊「飯堂」之一，但違例吸煙情況嚴重，街坊皆敢怒不敢言。「我哋只係普通巿民，唔通真係走埋去叫啲人唔好食煙咩！」陳不滿掌執法權的食環署及控煙辦職員對問題視若無睹，「咁耐都冇見過有職員行過出嚟叫人唔好食煙，根本就冇心做嘢」。
食署去年零檢控
記者曾多次到實地了解，每次僅逗留一小時左右，發現不時有食客於熟食中心「吞雲吐霧」，即使身旁有「嚴禁吸煙」告示，煙民亦視若無睹，期間未見有人上前阻止或執法。
食環署發言人表示，接獲本報轉介後即派員巡查，期間並未發現有人在熟食中心內吸煙。
發言人重申，上址除有負責日常管理的承辦商職員巡查外，當局亦不時派員作突擊巡查，並已在當眼處貼禁煙海報及告示。過去一年，該署共接獲一宗相關投訴，但沒有人被檢控。
衞生署控煙辦公室發言人則表示，在過去一年總共接獲十宗上址有人違例吸煙的投訴，並先後進行了十三次突擊巡查，總共向違例人士發出七張定額罰款通知書。
當區區議員侯金林指出，古洞街巿購物中心為區內居民購物及用膳集中地，一直不乏人流，認為食環署與控煙辦須多加巡查及主動執法。
議員轟執法被動
侯說：「啲人試過食煙冇人捉，下次就會再嚟食，其他人見到又會跟住食埋一份，唔執法就冇阻嚇力！」侯又呼籲市民需保持公德，不應違反《禁煙條例》的同時，更不應逼他人吸食二手煙。
「一年先係得幾單檢控，究竟控煙辦係咪特登揀冇乜人流嗰陣先去巡？」立法會衞生事務委員會委員張國柱直指食環署與控煙辦檢控數字奇低，足反映兩部門執法被動，要求改善，「就算控煙辦耐唔耐先嚟一次，嗰度係食環署主場，駐場職員冇理由睇唔到又捉唔到！」張國柱又建議兩部門須增加透明度，於事後交代巡查的日期和時間，以供公眾監察。
記者：朱廣華