橋唔怕舊，最緊要受。暑期工陷阱、倫敦金騙案，呢啲手法就好似港府嘅施政失誤一樣，年年歲歲花相似，歲歲年年人不同。奇就奇在，雖然騙徒手法千篇一律，熟口熟面，但仍然不斷有市民誤墮天仙局，搞到人財兩失，到底出咗乜嘢問題呢？
嗱，解答呢個問題前，不如先聽下消委會點講啦，從中應該可以搵到靈感。先講求職陷阱，消委會上年收到七十七宗求職變消費嘅投訴，比前年勁升一點二倍。至於行騙手法咯喎，不外乎舊酒新瓶，多數係受害人未返工就被要求買課程或產品。其中一名學生被騙四萬幾蚊，求職不成，反而欠落財務公司一身債，欲哭無淚，真係諗起都心痛。
至於倫敦金騙案咯喎，一樣長騙長有。消委會過去兩年共接獲五宗投訴，涉款三十五萬蚊。
唉，真係唔明白，煲呔曾貪財暴舔，貪婪手法五花八門，海陸空都出齊，大家就話估佢唔到啫，求職陷阱同倫敦金騙局來來去去嗰幾招，點解仲會有咁多人上當呢？點解騙徒咁易得手呢？
其實，答案好簡單啫，受騙嘅好多係年輕人，佢哋入世未深，經驗不足，加上急於搵工，咪好易中招囉。之不過咁，功夫茶始終認為，騙案禁之不絕，騙徒猖獗橫行，歸根究柢，就係港府打擊不力，法例漏洞叢生。
唔係咩？上年暑假前，警方係威係勢，大鑼大鼓宣布成立專案小組打擊求職陷阱，當時講到天花龍鳳，結果做就無影無蹤。一年過去嘞，墮入求職天仙局嘅受害人不減反增，當局點解釋呢？
至於法例漏洞百出，就更加唔在講，單係設立消費冷靜期呢樣嘢，就令人扯晒火啦。消委會四年前已經向港府提出設立消費冷靜期，保障消費者權益，但係當局一直闊佬懶理，關人個關，拖到依家仲未成事，搞到市民一年復一年受騙，一次又一次被呃。正所謂，「我不殺伯仁，伯仁因我而死」，學生受騙，官僚實在難辭其咎。
嗱，港府換屆，貪曾呢個官場騙子就快滾蛋嘞，港產官僚係咪亦應該洗心革面，為市民做番啲實事呀？尤其係暑期快到嘞，呢個係年輕人搵工嘅高峰期，更加係騙徒四出搵食嘅旺季，港府快啲做嘢，千祈咪再偷懶吖！
一句講晒，港產官僚尸位素餐呃飯食，同無恥騙徒無分別。咪話功夫茶唔提醒，立法會保皇黨包庇貪曾，必受市民唾棄，當局縱容騙徒橫行，等於助紂為虐，一樣被市民唾罵o架咋！