立法會早前因為出缺安排拉布戰積壓咗大堆議程，月底開始要日以繼夜、夜以繼日咁開會清理，尋日內務委員會討論有關安排時，泛民主派同建制派議員互翻舊帳，展開罵戰。有份拉布嘅社民連梁國雄（長毛）建議請定啲醫護人員駐守立法會，以防建制派喺開會中途心臟病發暴斃，又暗寸本身係老人精神科醫生嘅工聯會潘佩璆能醫不自醫，要請埋心理醫生睇睇。
潘佩璆即刻扯火反駁，話立法會搞到咁，正正係因為長毛等泛民議員拉布造成，佢唔反對請醫護人員協助，但強調「啲心腸唔好嘅人係無得醫」，暗寸番長毛心腸唔好。
內會主席劉健儀就仲搞笑，話啲醫護人員幫議員急救時，亦要留喺會議廳內進行，方便計人數，以免因為有議員被抬離場而引發流會。堂堂立法機關搞成咁，真係香港人嘅悲哀！