政情：蘇菲梁陳亨利互笠高帽
紡織及製衣界立法會議員梁劉柔芬（蘇菲梁），尋日朝早帶埋「接班人」聯泰控股行政總裁陳亨利（Henry）參觀立法會，之後又大讚Henry素來有心服務社會同業界，睇嚟蘇菲梁想喺卸任前將自己過去十五年來嘅從政錦囊傳授畀接班人喎。
Henry話，蘇菲梁因為要一直留守立法會行唔開，所以佢專登上門搵蘇菲梁傾偈。Henry透露，自己從事家族生意十幾年，現時正積極考慮參選九月立法會選舉，現時就忙緊透過紡織製衣諮詢中心接觸業界選民，又話希望當選後可以代表業界做到啲嘢喎。
Henry就大讚蘇菲梁喺行內資歷深厚，要向對方多多學習。蘇菲梁亦大讚Henry處事圓滑同了解業界訴求，又話佢近年一直默默支持業界發展喎，總之兩人不停互笠高帽。話時話，近日好多疑似局長人選或立法會參選人相繼現身立法會睇環境，莫非佢哋已經勝券在握？