政情：黃容根風高浪急爭連任
自動當選咗十二年嘅漁農界立法會議員黃容根，業界一直有聲音要求佢退位讓賢，根哥尋日同傳媒聚會時自爆，預計最少有兩人會喺九月立法會選舉挑戰佢，但兩個都係「自己人」，一個係黨友何俊賢，另一個就係經濟動力成員陳美德。不過，根哥話未驚過，歡迎有競爭，仲話現時漁農界風高浪急，又遇上政府換屆，好多業界都要求佢連任撐住大局喎。
根哥一句風高浪急，無意間寸爆經濟動力林健鋒（Jeffrey），Jeffrey前日喺立法會答問大會上，竟然以風高浪急為由，要求貪曾留任多一陣，簡直係與民為敵，如今根哥以同一理由連任，Jeffrey應該唔會反對啩？
根哥重申，雖然佢同何俊賢分屬黨友，但絕對唔係同聲同氣喎。至於陳美德參選，根哥話曾經搵過身兼經濟動力成員嘅鄉議局主席劉皇發傾過，但發叔似乎唔係好理，仲話一齊選睇吓邊個贏喎，反映鄉事派懶理經濟動力狙擊民建聯，睇嚟漁農界呢場建制派內戰，陸續有好戲上演。