政情：CY用人唯才 體現香港營
特首選舉後，候任特首梁振英（CY）隨即呼籲各界放下分歧，聲稱香港今後再無唐營、梁營之分，所有人都係屬於「香港營」，雖然CY釋出善意，但唐營中人仍抱有懷疑，更擔心被報復。不過，CY就喺新政府埋班用人嘅過程中以行動證明一切，好似尋日就有多名「深唐」人士獲政府續任法定機構公職，足以證明CY用人不疑，用人唯才。
CY之前講過，現屆政府喺公布任何跨越七‧一嘅任命前，要先取得候任特首辦公室嘅「不反對通知書」，咁講即係話CY都有份批准呢啲任命。咁啱尋日政府刊憲公布被稱為「蘭桂坊之父」嘅盛智文續任海洋公園主席兩年，而喺特首選舉期間擔任唐英年競選辦公室副秘書長嘅劉鳴煒，亦再度獲委任做海洋公園董事局成員，同樣係任期兩年。
盛智文同劉鳴煒都稱得上係深唐人士，特別係盛智文，已經擔任海洋公園主席九年，遠超過公職最多只做六年嘅不成文規定，所以連佢之前都講過話唔知七月後會何去何從。不過，盛智文任內將海洋公園搞得有聲有色，CY認同佢續任，證明係用人唯才。盛智文就同我哋講，佢續任後會繼續做到最好，搞好海洋公園，帶畀港人歡樂喎。
唐唐細佬留貿發局
政府尋日又委任唐慶年同劉麥嘉軒為貿易發展局成員，任期同樣係兩年。眾所周知，唐慶年係唐唐嘅細佬，而劉麥嘉軒又喺選舉中押注支持唐唐，外界好多人都揣測佢哋會無得留低，但如今可以續任，事實足以證明一切。
CY尋日又分別同之前挺唐嘅工商及專業界別立法會議員會面，其中包括經濟動力林健鋒（Jeffrey）同喺選舉中投白票嘅自由黨張宇人（Tommy），會面後反應正面。Tommy亦都聯同一班飲食業龍頭同CY共進午膳，據知會上唔少老闆向CY反映飲食業請人困難，要求CY考慮輸入外地勞工。從以上CY嘅實際行動睇嚟，完全體現出依家只有「香港營」。