中環出更：最後午宴遭奚落 「曾」折墮
剩番兩星期任期嘅貪曾，因為貪盡海陸空嘅醜行而成為過街老鼠，被市民唾棄之餘，尋日佢最後一次出席立法會午宴時，亦被議員由頭奚落到尾。一開始獲社民連長毛梁國雄「送鐘」，入席時又無泛民主派議員肯同佢坐埋一枱，最後主席曾鈺成仲送咗個杯墊畀佢留念，話將來飲咖啡時都可以諗起立法會喎，擺明暗寸貪曾畀廉政公署請飲咖啡調查佢，認真折墮。
立法會議員每年都會同貪曾及一班高官午宴，尋日係貪曾執包袱前最後一次，唔知係咪佢人緣差，一班民主黨議員好似李華明、黃成智咁，只係同公務員事務局局長俞宗怡等唔留任嘅高官合照，但同樣夠鐘走人嘅貪曾，就無泛民理佢，就連審計署署長鄧國斌見到佢都好似見鬼咁兜路行，好似怕咗佢咁，睇嚟貪曾已經去到神憎鬼厭嘅地步。
長毛送鐘 硬食黑面
唯一肯走埋去貪曾度嘅泛民議員，就只得長毛一人，但長毛有備而來，向貪曾送咗個購自以色列耶路撒冷嘅「教皇鐘」，祝福貪曾夠鐘走人，一向小器嘅貪曾喺傳媒鏡頭下，尷尷尬尬收咗呢份「厚禮」，但塊面已經忍唔住，黑過鑊撈。
泛民杯葛 拒絕同枱
到入座食飯時，貪曾繼續成為杯葛對象，佢嗰枱一位泛民議員都無，原來佢哋喺抽籤時講明唔想同貪曾坐，抽到主家席號碼都擺番低，簡直當貪曾冇到。
當大家入席後，曾鈺成就代立法會送咗一份印有立法會圖案嘅杯墊畀貪曾，仲話希望貪曾第日飲茶、飲水同飲咖啡時都諗起立法會喎，暗寸貪曾將來畀廉署請飲咖啡時，都要記住立法會喎。
不過，貪曾似乎畀人寸完都唔知咩事，因為佢喺席間同人講，打算離任後即刻去加拿大探親，回港之後先諗搬去邊度住，事後佢仲好開心咁將收杯墊嘅相放上網，但點知畀網民鬧爆佢人渣兼無恥，呢啲咪係自作孽不可活囉。
卓妮