封單車泊位 事前冇通知
「有工程做緊都唔貼通告通知聲，搞到我都唔知拎唔拎走架車好！」居於天水圍的楊先生日常以單車代步，早前將單車停泊到輕鐵樂湖站側的公眾泊位時，竟發現泊位遭圍封，不滿部門未有事先知會。
路政署發言人指出，上址正進行樹穴改善工程，預計於六月底完成，強調承辦商早已於工程展開前張貼告示，通知受影響居民。發言人說，大部分單車使用者已接獲通知並將單車駛離工程範圍。至於未移走的單車則不影響工程進行，但會持續張貼通告通知受影響市民有關臨時交通安排。
「明明係個工程開始之後先貼通告，邊有事前通知？」即使路政署就事件作出解釋，楊先生卻直指與事實有出入，質疑承辦商未有依足指引於工程前張貼通告。
元朗區議會地區設施管理委員會主席李月民指出，類似事件經常發生，認為事涉路政署對工程承辦商監管不足，要求部門加強監管，「之前都試過冇事前通知，有人投訴先識貼通告，整壞咗單車都唔知邊個負責！」