年屆七十五歲嘅鄉議局主席劉皇發，身體健康狀況尚算理想，但佢尋日喺立法會忽然關心專為末期病人而設嘅「預設醫療指示」，又擔心長者唔識上網查閱資料。點知食物及衞生局局長周一嶽（周一鑊）回應話好樂意會後親自解釋畀發叔聽喎，聽落好似詛咒緊發叔咁，唔通無得撈就可以大口成咁？
話說有議員提出口頭質詢，希望知道香港落實「預設醫療指示」嘅進度，簡而言之，呢種指示係畀末期病人有能力做決定時，自行決定如果病危、昏迷或者處於持續植物人狀況時，使唔使醫生繼續進行明知無效果嘅治療。周一鑊就話有關「指示」已經上晒網，市民可以隨時下載參考。
發叔質疑話，包括佢在內嘅好多長者都唔識上網，想知有無其他途徑睇到呢類資料。周一鑊就回應，除非個病嚴重，否則唔需要理會，又話如果發叔想了解，佢可以親自講解畀對方聽喎，搞到發叔無晒癮。梗係啦，諗住關心政策內容啫，點知好似被人詛咒咁。